بند ہوئے اوہ پھاٹک

بند ہوئے اوہ پھاٹک جِتھوں واء لنگھدی سی
روز سُنیہڑے لَے کے
ہُن نہیں اَؤنی
ہُن نہیں کُھلنا بُوہا جیہڑا
دِل ویڑھے نوں وجّا
ہُن نہیں ہتھّاں تینڈی چھوہ نال سورج ہونا
ہُن نہیں دُھپّاں لہو دے اندر
چھاں دی آس جگاؤنی
ہُن نہیں چن دا ڈِیوا بلنا وِچ پردیسی اکھّاں

ہُن نہیں کنّاں رَولا پوؤنا
فون دی گھنٹی سُن کے
خالی ہوگئے کپ جیہڑے
اساں تینڈے واسطے بھر بھر
دن دے ٹیبل اُتّے رکھّے

نہیں بھرنے اوہ کھپّے جیہڑے
رات اساڈے سینے اندر کِیتے
نہیں ٹُرنے اوہ منتر جیہڑے
روز وظیفے کر کر ابّے
چھاتی اُتے پُھوکے