بھلا بھلا جیؤ آیوں عِشقا ،مکر فریبی یارا
ہِک دِن صُلح بناویں آپوں، آپ کریں جنگ بھارا
کدے سیانا کریں سؤدائی، دے کے مست پیالا
کدے جھلّے نُوں شربت دے کے، تُرت کریں سُدھ والا
جاں دِلبر دِی زُلفے اندر، ماریں گنڈھ حُسن دِی
خفقانے دے سنگل اندر، پین سیانے بندی
جاں اوہ گنڈھ کُشادی کر دے، پھٹے دین صفائی
بلدا پھیر چراغ عقل دا، لگ پیندی رُشنائی
سیف ملُوک ہِک راتیں آہا، خالی ہوشوں صبروں
غش غماں دِے اندر سُتّا،کن ڈورے ہر خبروں
مت کوئی جانے سُتّا آہا، غیر ولوں دِل سویا
درداں تھیں آرام نہ آوے ،بُہتا دُکھیا ہویا
پٹّے وال گھتّے سِرگھٹّا، رُنّا گھت کہائیں
سجدے پے سجن نُوں کہندا ،سُن عرضاں دِل لائیں
ہوش قرار میرا تُدھ کھڑیا ،عِشرت عِیش جوانی
غم دے کے غمخوار نہ ہویوں، دِل کھڑکے دِل جانی
نشتر مار مُحبّت والی، سُرت نہ لیّوئی مُڑ کے
جے میں جاءتُساڈی جاناں، پُہنچ رہاں ڈِھہہ کُڑکے
سیر شکار کرِیندا خُشیاں ،قید اندر تُدھ پایا
دانشمند شہزادہ نامی، جھلّا نام دھرایا
نہ میں یار کہاون لائق، ناہیں تُساں پیارا
گولا کرکے رکھ بندے نُوں، ان مُلّا بے چارہ
قدر تیرا گھٹ جاندا ناہیں، جے رکھّیں کر گولا
کر آزاد مینُوں اِس رنجوں ،جھول مہر دا جھولا
میرے جیڈ نہ ہووے کوئی، دُنیا تے دُکھیارا
جگ تے نام ملامت جوگا، وٹّے دار نکارا
اؤگن میرے تک تک مائی، جم کے پِچھّو تاندی
بابل نُوں فرزندی میری، ننگ پئی نِت لاندی
نؤکر چاکر آپو اپنے، گئے ہِکلاّ سُٹ کے
یار اشنانہ تکدا کوئی اکھ، میرے ول پٹ کے
کیسی اگ لگائیوئی مینُوں ،سڑیوس وانگر ککھّاں
تُساں نہ پاس پَر تو توڑے ،آس تُساڈی رکھّاں
دِلبر اگّے عرضاں کردا، سؤں گیا شہزادہ
دِل نُوں بوء سجن دِی آئی، مستی چڑھی زِیادہ
خوابے اندر نظری آیوس ،صُورت مُورت والی
کے کُجھ صِفت سُناواں اُس دِی، شرح بیانوں عالی
سیف ملُوکے خوابے اندر، پلّا اُس دا پھڑیا
رتُّورو نمانا عاشق، پَیراں اُپّر جھڑیا
کہندا ہے معشُوقا تُدھ بِن، بُہت نمانا سڑیا
من سوال مُحمّدبخشا ،سٹ نہ جائیں اڑیا
جِس ایہہ صُورت جوبن دِتّے، قسم تینُوں اُس ربّ دِی
کیہڑا شہر ولایت تیری ،دِیئیں نِشانی سَبھ دِی
اپنا آپ دسالیں مینُوں ،دس پکیرِی پاویں
کِس رستے میں ٹُراں تُساں ول، خُشکی یا دریاویں
صُورت نے فرمایا جے کر، اِس وِچ مطلب تیرا
شارستان سنہری اندر ،باغ اِرم میں ڈیرا
شاہ شاہپالے دِی میں بیٹی، پریاں دِی شاہزادِی
حُسن جمال میری ہے مائی، مہر افروزہ دادی
جے تُوں میرا یار کہاویں ،عِشق تیرے دِل وسیا
میرے باجھ نہ ہور قبُولیں، رہیں نہ پھاہی پھسیا
حق مُحبّت میری سندا، رکّھیں وانگ امانت
کریں نہ جُوٹھا مُنہ پیاروں، پُہنچیں باجھ خیانت
مت جانیں معشُوق میرے نُوں، مُول نہیں پرواہاں
دِل پر داغ تُساڈا دائم، میل مُحبّت چاہاں
میں پری تُوں آدم خاکی، پر چِت ا ساڈا اڑیا
نِت اُڈیک شتابی آویں ،ندئییں پے کے اڑیا
فَاطْلُبْنِیْ تَجِدْنِیْ میاں ،میں مؤجُود تُسانُوں
میرے باجھ نہ چاہیں دُوجا، لیسیں لبھ اسانُوں
میں تے آپ مُحبّت تیری ،تُدھ تِھیں کُجھ زِیادہ
تاہیں آپ سداواں تینُوں ،جھبدے آء شہزادہ
خُشکی رستے پُہنچ نہ سکسیں ،ٹھیل ندی وِچ بیڑے
لہر عِشق دِی مان مُحمّدؒ، چھوڑ تمامی جھیڑے
ندی مجاز سمند حقانوں،کھڑسی راہ اولّے
بیڑا بھج ہووے گا ٹوٹے ،کد ثابت سنگ چلّے
رُوح شہزادہ ندی پرم دِی ،بیڑا جان بدن نُوں
جانی نال ملیں تُدھ جانی، کریں شِکستہ تن نُوں
خُشکی رستہ خُشک عِبادت ،بِن سوزوں بِن دردوں
ایہہ عِبادت مَلکی بھائی، ناہیں عارف مردوں
مندے حُکم عِبادت کر دے ،شر نہیں نفسانی
یار سوئی جِس عِشق کمایا، ایہہ دؤلت اِنسانی
عِشقے کارن آدم کیتا، مِحرم یار یگانہ
آہے مَلک عِبادت جوگے، کے حاجت اِنساناں
خِدمت گار حُکم دِے بندے ،بُہت آہے سُلطانے
جو کم فرض ایازے اُتّے، ہور کوئی کے جانے
رکھ گھوڑے دِی واگ مُحمّد، پھیر پِچھّے کر پھیرا
اِس مِیدان قواعِد جوگا ،ہے کے بادر تیرا
صُورت دِلبر دِی جد پائیاں، خوابے اندر جھاتاں
آکھ سُنائیاں عاشق تائیں، پتے نِشانی باتاں
جان پئی تن مُردے تائیں ،اُگّھڑگئیاں اکھّاں
ہوشاں سُرت سنبھالاں ہوئیاں، ہِکس ہِکس تِھیں لکھّاں
اِس خوابے شاہزادِے تائیں، دِتّی اگّے والی
ہوش جندُ وتے صبر دِلے وِچ ،تن قُوّت مُکھ لالی
اِس لیلیٰ وِچ سُتّے عاشق ،ہوکے مجنُوں جھلّے
خوابوں لے ہوشیاری اُٹّھے، جاگے بخت سولّے
پِیّا پریت دسالی اپنی ،دِل اندر جوش آیا
پھیر نویں سِر عقل کھڑایا، دانش تے ہوش آیا
کرے آواز غُلاماں تائیں، جاگو ساتھی دُکھ دِے
دیؤ مُبارک باپ میرے نُوں، خبر سُنیہے سُکھ دِے
دانش عقل دِتّا ربّ مینُوں، سُکّی نہر وگائی
آؤ سنگل لاہو میرے ، ول ہویا سؤدائی
عاصم ایہہ مُبارک سُن کے، چایا خُشی کمالے
ہو بے ہوش گیا کوئی ساعت، جاں آیا وِچ حالے
جِس گھر بیٹا قِیدِی آہا، اُس گھر گیا شتابی
پڑھ شُکرانہ سنگل لاہے، ہوئے کرم وہّابی
انگل پھڑ کے آن بہایا، اُپّر تخت سنہری
سوہنے سبھ اِکٹّھے ہوئے ،بیٹھے لاء کچہری
ہانی یار لگّے رل بیٹھن ،کول چنّےدِے تارِے
ہسّن کھیڈن باتاں کر دِے ،شہزادے سنگ سارے
گلّو گل ہلاندے جاندے ،ہر ہر شہر مُلک دِی
مُڑ مُڑ کے اوہ گل مُحمّد ،باغ اِرم ول ڈُھکدی
