عاشق پئے صلاحیں

مچھی آکھے ساون نوں
وڈے دل دریاواں دے
کیہ منگیے دل پرچاون نوں
تے تریہان اکھ ترساون نوں
تے بُھکھ کلیجہ کھاون نوں
نہیں بئی نہیں بئی
سَاہ نانہہ آون دیندیاں چھلاں
مارو ہڑ حیاتی لنگھدی ہک ہک ڈکے راہ
ساہنوں نت نت تیرا تراہ
کچ گھڑے ہرجاون نوں
چھڈ چھڈا کے سب کُجھ تیریاں اکھاں مُڈھ
جی کردا مرجاون نوں
نانہہ نی نانہہ۔۔۔ تینوں کیہ ہویا
کیہ عشق تریلی آئی
ساہاں اُکھڑن تائیں تریئے
ہونی کولوں مت نانہہ ڈریئے
ان ہونی نوں رت پیوایئے
ہاں نانہہ دے وچکار کھلو کے
وڈی ساری نانہہ کلیجے وچ لُکا کے
نکی جنی اک ہاں دے پِچھے
نور حیاتی ہس گوایئے
اگ تر جایئے جل تر جایئے
کیہ کر جایئے
شینت
تے مر جایئے
مڑ آون گے روندے دھوندے
گئے سندیسے کاواں دے
وڈے دل دریاواں دے