سِج لتھا روہی کالڑی
موئی گُڈیاں کھیڈ دی بالڑی
مُکھ پیلا انگ جگراتڑے
من کُوک بنیرے لالڑی
قد قہر کہاوت پاؤنا
کہیں ڈٹھی دل دی حالڑی
دل لب لبریز ہم سَکھنے
ہتھ کگن کنیں والڑی
اساں لیر و لیر جھریٹیاں
اساں بیری جھولی پالڑی
مُکھ بند کتاب اکھ تارڑا
سج تکنی مُورت کالڑی
گنھ پیڑا کیتم پنڈڑا
ہتھ عشق چنگیری چالڑی
در بند کیتم دیدار دے
ہوٹھیں کُوں لائیم تالڑی
حوالہ: اٹھے پہر تراہ، سانجھ لاہور؛ صفحہ 83 ( ویکھو )
