جوٹھ دی ڈھیری

ویاہ دی جوٹھی ڈھیری چوں دو بچے چول پئے کھاندے
"اج دن کِڈا چنگا چڑھیا!" اک دوجے نوں آنہدے
"گھروں نکلدیاں سار اے سانوں لبھّ گئی جُوٹھ دی ڈھیری
انگلاں بھریاں ہڈیاں لبّھن، کجھ تیری کجھ میری"
اک پاسے اک کتا ڈِٹھا، بھکھا خَورو پاوے
بچے ویکھ کے ڈردا جھکدا، نہ پیا نیڑے جاوے
کاں بوٹے تے کاں کاں کردا، چَولاں نوں پیا ویکھے
مار ٹپوسی اڈدا بیہندا، کی پئے پین بھلیکھے
اک بڈھا خدار سیانا، منہ تے پگّ دا پلہ
آکھے "جے پتّ زندہ ہندا جوٹھ تے ماردا کھلّا"
ڈھیری نیڑے اک بیوہ پئی بیوہ دھی نوں آکھے
"اج وی کھان نوں کجھ نہ لبھا، کیہڑے دیس دے راکھے
تگڑے ایتھے ای لٹّ لٹّ کھاندے، کھاندے جوٹھ نمانے
کد چُکیں گا ربّا! ایتھوں خان تے نون ٹوانے"