بندیا ساہ دا کیہ وساہ
دم دم دنیا داری کردا
سو سو دُھپاں پالے جھردا
پل پل ٹھنڈے ہوکے بھردا
اوڑک اُکھڑی جاوے ساہ
بندیا ساہ دا کیہ وساہ
محل منارے کوٹھے ویہڑے
زر، زن، زمین دے جھیڑے
ملک الموت آن نبیڑے
سِروں کُوڑی پَنڈ نوں لاہ
بندیا ساہ دا کیہ وساہ
ہو سُو نفسا نفسی تھیوے
آدم زادہ مر مر جیوے
تیل بِناں نہ بلدے دیوے
ٹھنڈی پیندی عشق دی بھاہ
بندیا ساہ دا کیہ وساہ
کُھسیا ویلا ہتھ نہ آوے
پانی پتنوں لنگھی جاوے
کوئی نہ اڑیا شور مچائے
کم نہ آوے سڑکن راہ
بندیا ساہ دا کیہ وساہ
غفلت تیری ازلی دشمن
شوکاں مار پُھلاوے پھن
مُڈھوں بے اتبارا تن
ناگن ڈسدی دیندی ڈاہ
بندیا ساہ دا کیہ وساہ
من باجھوں کیہ قیمت تن دی
سورج ول کر صورت چن دی
اڑیا پل وچ گل اے بندی
میراں رب وی آکھے واہ
بندیا ساہ دا کیہ وساہ
حوالہ: تلاوت وجود؛ صفحہ 241