غریب کوں کیں غریب کیتے، امیر زادو جواب ڈیوو
ضرورتاں دا حساب گھنو، عیاشیاں دا حساب ڈیوو
سخاوتاں دے سُنہرے پانی، دے نال جہڑے مٹا ڈتے وے
او لفظ موئے ہوئے وی بول پوسِن، شرافتاں دی کتاب ڈیوو
شراب دا رنگ لال کیوں ہے؟ کباب دیوچ ہے ماس کیندا
شباب کیندا ہے، کیں اُجاڑے، حساب کرکے جناب ڈیوو
زیادہ پھلدا ہے کالا جیکوں، خرید گِھندا ہے اوہو کرسی
الیکشن دا ڈرامہ کرکے، عوام کوں نہ عذاب ڈیوو
قلم ہے منکر نکیر شاکؔر، جتھاں وی لُکسو ایہ تاڑ گھنسی
غلاف کعبے دا چھک تے بھانویں، ناپاک منہ تے نقاب ڈیوو
حوالہ: کلیاتِ شاکر، گفتگو پبلی کیشنز اسلام آباد؛ صفحہ 61 ( ویکھو )
