میں سُنیداں دل توں نکلی ہوئی غزل کُجھ غور کر

میں سُنیداں دِل توں نکلی ہوئی غزل کُجھ غور کر
مہربانی اَۓ خُدائے لم یَزل کُجھ غور کر

کہیں دے کُتے کھیر پیون کہیں دے بچے بُکھ مرِن
رزق دی تقسیم تے ہک وار وَل کُجھ غور کر

جاہلاں وِچ نفرتاں دا بِج کھنڈایا جو شیطان
عالماں وِچ پکدی پئی ءِ او فصل کُجھ غور کر

چپے چپے کربلا ہے کونے کونے تے یزید
کتنے خیمے جگ تے ویندن روز جَل کُجھ غور کر

میڈا مقصد ایہ تاں نی سُندا نِوھی مظلوم دی
توں سمیع ایں توں بصیر ایں دراصل کُجھ غور کر

غیر مسلم ہے اگر مظلوم کوں تاں چُھوٹ ڈے
ایہ جہنمی فیصلہ نہ کر اَٹل کُجھ غور کر

کون ہِن جو فی سبیل اللہ دا نعرہ مار کے
انتقاما پے کریندے ہِن قتل کُجھ غور کر

کون مومن کون کافر کون شاکؔر رہ گیا
ہِکو جیہاں ساریاں دا عمل کُجھ غور کر