تھی گیا جو کھوکھلا ایمان مسلمان دا
ساتھ ڈیون چھوڑ گے رحمان مسلمان دا
بے ضمیری دی بلا، غیرت دا بُوٹا چا گئی
نِت کرے انسانیت ارمان مسلمان دا
ڈے گیا خود ساختہ انجیل مسلمان کوں
چا گیا انگریز ہے قرآن مسلمان دا
خانہ کعبہ دی کمائی وی غیر مسلم کھا گیا
ہتھوں محسن بن گیا بئی مان مسلمان دا
جَیں کیتے پیارے نبیﷺ رو رو دُعائیں منگدے ریہے
بن گیا ہے پیشوا شیطان مسلمان دا
آخرت دا تھی گیا اُلٹا نظام اَح دوستو!
منتظر ہے دوزخی دربان مسلمان دا
ایہ عمل دا ہے نتیجہ کہیں دا شاکؔر کیا قصور؟
کافراں دا ہے خدا، بھگوان مسلمان دا
حوالہ: کلیاتِ شاکر، گفتگو پبلی کیشنز اسلام آباد؛ صفحہ 29 ( ویکھو )
