توں محنت کر تے محنت دا صلہ جانے، خدا جانے

توں محنت کر تے محنت دا صلہ جانے، خدا جانے
توں ڈیوا بال کے رکھ چا، ہوا جانے، خدا جانے

خزاں دا خوف تاں مالی کوں بزدل کر نہیں سکدا
چمن آباد رکھ، بادِ صبا جانے، خدا جانے

مریضِ عشق خود کوں کر، دوا دل دی سمجھ دِلبر
مرض جانے، دوا جانے، شفا جانے، خدا جانے

جے مَر کے زندگی چہندیں، فقیری ٹوٹکا سُن گھن
وفا دے وچ فنا تھی ونج، بقا جانے، خدا جانے

اے پوری تھیوے نہ تھیوے مگر بے کار نئیں ویندی
دعا شاکؔر توں منگی رکھ، دُعا جانے، خدا جانے