رانجھناں وے

رانجھناں وے سانوں پار دی سار نہ کو
اولی کدھی بانگاں ملیاں
پار نہ لگی لو، رانجھناں وے

میرے ہان دیاں سب کُڑیاں
پار گیاں اج تک نہ مُڑیاں
خبرے کیہڑے روڑھ چ رُڑھیاں
نہ کوئی پتہ نہ تھو، رانجھناں وے

چھڈ دے سانوں پار بلاوناں
بیبا پار اساں نہیں آوناں
جے توں ساڈا سنگ نبھاوناں
ایدھر آن کھلو، رانجھناں وے

ایدھر کنڈے لائیے واڑی
گوڈی دئیے روز دیہاڑی
مِلسی پیا خربوزہ پھاڑی
بے صبرا نہ ہو، رانجھناں وے

وچ پپوٹیاں نیندر سیتی
نیجھاں نظر ناکارہ کیتی
دل تے جو بیتی سو بیتی
اکھیں رہی نہ لو، رانجھناں وے

سانوں پار دی سار نہ کو