نی مائے اوہنے آپے ای چھیڑ ودھائی
میں سر دوش نہ کائی
اساں تے اس نال ہک مک ہاسے
فرق نہ ہا وچ کائی
ذرہ نہ گل ودھاونوں سنگیا
پکڑ دوئی دی سُولی ٹنگیا
میں کد اس توں وچھڑن منگیا
چھیڑم کدن لڑائی
نی مائے اوہنے آپے ای چھیڑ ودھائی
اپنا آپ وکھاونا چاہیا
آپے تِڑک کے باہر آیا
سارے جگ وچ رولا پایا
کیتوس جگت ہنسائی
نی مائے اوہنے آپے ای چھیڑ ودھائی
ہُن کلہیاں وی رہیا نہ جاندا
مُڑ سانوں گھر پیا بلاوندا
روز سنیہڑے ویکھ گھلاندا
لگئیوس عجب توائی
نی مائے اوہنے آپے ای چھیڑ ودھائی
حوالہ: کوئی اندروں در کھڑکاوے، صفحہ 55 ( ویکھو )
