نہیں نِرے ای پیسیاں نال ہنڈھدا

نہیں نِرے ای پیسیاں نال ہنڈھدا، وَل جِین ہنڈان دا ہور ہُندا
لور بُھکیاں رہن دی ہور ہُندی، چسکا رج کے کھان دا ہور ہُندا

مِل پیندے نیں راہ چ اوپرے وی، مزا جان پچھان دا ہور ہُندا
ڈھب چیزاں نوں ویکھن دا ہور ہُندا، ڈھنگ بندےتکان دا ہور ہُندا

پڑھنا اپنے آپ نوں ہور گل اے، دھندا لکھن لکھان دا ہور ہُندا
کم مُنڈے پڑھان دا ہور ہُندا، وتّر بندے بنان دا ہور ہُندا

ماس اِلّاں نوں پاؤنا ہور شے وے، چج نیکی کمان دا ہور ہُندا
خوشی کوٹھے اُسارن دی ہور ہُندی، خبط اُسرے ڈھاون دا ہور ہُندا

دُوتی گلیاں مل کے آکھدے نیں، راہ یار تک جان دا ہور ہُندا
لنگھ جائی دا ملکڑے اوس تھاؤں، جِتھے نہیں سہان دا ہور ہُندا

ایس پیری پریدی دے رُکھ والی، نہیں چھان کوئی مان دا ہور ہُندا
پَیریں پین دی لذت اے ہور جیہی، مزہ ہتھ چُمان دا ہور ہُندا

اج فیر مسیت چ بمب چلّے، ہوگئے شہید تنویر کِنٗے
نہیں چھیڑی دے نغمے پُھوڑ اُتے، ویلا غزل سُنان دا ہور ہُندا