تیرے نال نظارے چلدے رہندے نیں

تیرے نال نظارے چلدے رہندے نیں
میرے نال ستارے چلدے رہندے نیں

جد میں لہراں اُتے تیرا ناں لکھاں
سوچاں وچ کنارے چلدے رہندے نیں

کوئی نویں سویر نا وچّ نصیباں دے
پھر وی کرماں مارے چلدے رہندے نیں

تیرا سِکّا چلدا دل دے شہراں تے
میرے نال خسارے چلدے رہندے نیں

میرے چاء مر جانے کالیاں راتاں نوں
لے کے یاد سہارے چلدے رہندے نیں

میرا ہاسا چیک سی اکرم جیون دا
لہو دے وچ شرارے چلدے رہندے نیں