روپ دی گرمی تے جد وی شوق نوں میں تاپدا
شہر دا ای شہر مینوں تیرا عاشق آکھدا
بے قراری ویکھ میری تارے مینوں آکھدے
پیار تینوں ہو گیا اے تھوڑا تھوڑا جاپدا
قد سرو تے ٹور موراں، ہونٹ دو کھڑدے گلاب
حسن دے دریا نوں میرا عشق رہندا ناپدا
میری چاہت کھوہ لیا اے تیرا وی چین و آرام
چکھ لیا توں وی مزا ہن عشق والے خواب دا
قیس تے فرہاد رانجھے مورتاں تے ڈھل گئے
میرا لوں لوں ہے گواہ دن رات تیرے جاپدا
رنگ تیرے روپ دا جد چڑھ گیا اے شوق تے
پھر دوا دارو نہ کوئی عشق والے تاپدا
اک بشارت نال میرے وصل نوں کردے امر
اک دیوانہ تیرے ناں دا روز تینوں آکھدا
حوالہ: عشق دا ورقہ پھول، گلشن ادب پبلی کیشنز لاہور؛ صفحہ 30 ( ویکھو )
