شوخ ترچھی نظر نوں دلبر جھکا کے ماریا
تیر دل زخمی نوں اج تے نین بچا کے ماریا
عشقَ بےسرتے نوں اوہناں گھوریا اے جھوم کے
شیر ستے نوں شکاری نے جگا کے ماریا
ویکھ کے ہسدے نے پھیر اج ویریاں دے ویر پئے
پھیر یاراں یاریاں دا پجّ پا کے ماریا
زندگی بخشی جے بے درداں دی بے دردی کدی
دردیاں نے درد دے قصے سنا کے ماریا
جا کے وچ عقبہ دے دیکھاں گے ملی جے زندگی
زندگی نے وچّ دنیا دے لیا کے ماریا
مار کے بندے کئی کر دتے نے جیوندے خدا
کئی خداواں نوں خدا بندہ بنا کے ماریا
سکھ لئی اے جانچ ایہناں خوب مرکے جیون دی
عاشقاں نوں عشقَ خورے کی سکھا کے ماریا
ماریا زنداں نوں پا کے زہد دے وچ زاہداں
زاہداں نوں خچریاں رنداں پیا کے ماریا
نظر نے لب دی کرامت نال کئی واری اوہناں
مار کے سانوں جیوایا مڑ جیوا کے ماریا
ماریا سی کل اوہناں کرکے گلے سانوں فقیر
اج اساں اوہناں نوں شعر اپنے سنا کے ماریا
