گناہاں نوں قبولن لئی زیارت کرن آیا ہاں
رقیباں نوں وی دیکھو میں محبت کرن آیا ہاں
سہارا جھوٹھ دا لے کے گیا ساں جت لیکن ہن
کچہری سچ دی اندر مقدمہ ہرن آیا ہاں
کسے دی زندگی خاطر قضا منظور ہے کیوں کہ
معصوماں واسطے ہی سر تلی تے دھرن آیا ہاں
بڑی ایہہ بے بسی تے سنا پن ہے رڑکدا تیرا
خلا ڈونگھا صحیح لیکن میں اس نوں بھرن آیا ہاں
میں دتی زندگی دی ہر خوشی ہی وصل وچ اس نوں
اتے ہن ہجر دی اس واسطے ہی جرن آیا ہاں
ہنیری رات وچ الفاظ دی میں روشنی کرکے
دلاں دے کورے کاغذ تے کتابت کرن آیا ہاں
حوالہ: گفتگو؛ سانجھ؛ صفحہ 34 ( ویکھو )
