قصہ سیف الملوک

رہائی بارے دسنا

جاں چڑھ بیٹھی تخت سُچے تے، ملکہ کول بہائی
نال پیار پُچِھیندی گلاں، جیوں ماؤ دی جائی

ملکہ خاتوں نوں فرماندی، ہے سندر مُکھ بھینے
لِکھے دُھر درگاہ سچی دے، تُدھ آہے دُکھ لینے

کیکر گزری حال حقیقت، کس قَیدوں چُھڑکائی ایں
قلزم دے شاہزادے کولوں، کِت بِدھ نِکل آئی ایں

کے سبب بنایا قادر، کہو کے قدرت ہوئی
ایسا کامل مِلیا تِینوں، کون مؤکل کوئی

ملکہ سی حیران نہایت، وِیکھ عنایت ذاتی
تاب حُسن بِیتاب کیتی سی، بیَٹھی چُپ چپاتی

تابش جوش حُسن دی کولوں، رہی نہ ہوش ٹکانے
بِربِرتکے بول نہ سکے، ایہ دلیلاں آنے

واہ کاری گر سرجن ہارا، سبھ قدرت دا والی
چُونوں اُتے چگو نوں دائم، پاک اوہدا در عالی

نہ اس جِند نہ جُثہّ جامہ، بے مانند الٰہی
لَمْ یَلِدْ وَلَمْ یُوْلَدْ ہے سَدا، اوسے دی شاہی

آپ حَکیم سبھے بِدھ جانے، ہڑکوں رُکھ بناندا
قطرے ہک منی دے وچوں، خوب مُنکھ سُہاندا

پانی دی ہک بوندبے قدری، ہو جھڑی اسمانوں
دُر یتیم بناوے اس تھیں، لعل پتھر دی کھانوں

شاخ ہری تھیں پھُل نکالے، پھُلے وچوں دانہ
ہک رنگوں سَے رنگ بنائے، آپ حکیم سیانا

پتھر نوں دے نور جنابوں، سورج کر چمکاندا
پانی دے ہک قطرے وچوں، عرش مجید بناندا

ساوریاں تھیں گورے کردا، گورے وچوں کالا
سِپ سمندر وچوں موتیں، کوہ قافاں وچ لالہ

کردا نبی کُفاراں وچوں، سِر پر تاج ٹکاکے
ملکاں تھیں شےطان بنائے، طوق گلے وچ پا کے

دُنیا داراں دے گھر دِیندا،بِیٹے ولی الٰہی
ولیاں دے گھر پیدا کردا، میرے وانگ گناہی

قدرت اُس دی دا کُجھ مینوں، انت حساب نہ آوے
سُکی لکڑ سِرّ حقانی، بَن رباب سُناوے

وہنی صُورت سِرّ الٰہی، عام نہ سمجھن سارے
خاصاں باجھ محمدبخشا، کون کرے نستارے

وقت نا وقت پَچھان فقیرا، گُجھی رمز نہ کہو کھاں
قصّہ تروڑ اُچیرا ہوویں، بَیٹھ نِچلا رہو کھاں

ملکہ خاتوں شکل پری دی، وِیکھ تعجب ہوئی
دم مارن دی رہی نہ طاقت، گل نہ کردی کوئی

ایسی صُورت ایسی سیرت، ایسا روپ نورانی
دھن خالق جس ایہ بنائی، مظہر حُسن حقانی

پری بُلائے ملکہ تائیں، ملکہ بول نہ سَکدی
پئی ہلائے گل کرائے، اوہ مُڑ بِربِر تکدی

جاں کُجھ ہوش ٹکانے آئے، اوکِھی ہو کے بولی
شاہ پری نوں کہندی بھینے، میں تیرے توں گھولی

حُسن جمال کمال تیرے دی، جھال نہ جاندی جَھلی
کَنّ ڈُورے جِبھ گُنگی ہوئی، ہوش گئی میں جَھلیّ

آب تیری تَک تاب نہ رہیم، ہو غرقاب رہی میں
گل نہیں ہو سکدی ایہ بھی، مَندے حال کہی میں

یاد مینوں ہِک سُخن نہ رہیا، ناں اندر وچ پھردا
کَن نہ سُندے منہ نہ ہِلدا، حرف نہ جِیبھوں کِردا

شاہ پری پھر ہَس کر یہیں، سِر ملکہ دا پھڑ کے
سینے اپنے سنگ لگایا، نال پیار پکڑ کے

ہَتھ مُوہیں تے پھیرن لگی، نال محبت خاصی
لذت گل دی تاہیں جس دم، سُوہنے ہون اخلاصی

رحمت دا ہَتھ پِھیرن سِرتے، دین پیار لباں تے
پھُلاں جیسے سُخن اُس وِیلے، پِھرن ہزار لباں تے

اَیسے بھاگ لگن گے کس دن، دائم شگن وِچاراں
سینے لاپُچھے گا گلاں، سُوہنا نال پیاراں

ملکہ والا سفر کٹیں تے، مار دیوے نوں آویں
مُدّت پِچھے مِلیں محمد، تاں سُوہنا گل لاویں

نال پیار پری دے ملکہ، بہت ہوئی خوشحالی
ِمٹ گئی اوہ مَست خُماری، ساری ہوش سنبھالی

دل وچ کہندی یارب سائنیا، سیف ملوک بے چارا
ایسی آفت ڈِٹھیاں ہویاں، کیکر کرگ گذارا

ایسی شوخ لڈکی صورت، شان گمان بھری ہے
وِیکھن سات مَرے گا بھانویں، خونی ایہ پری ہے

اوہ پتنگ ایہ لاٹ اگے دی، مرسی بُھج اُتھائیں
سیف ملوکے دی رب سائنیا، کِیویں جان بچائیں

پھیر پری نوں آکھّن لگی، نال زبان رسیلی
ہے بھینے توں پریاں وچوں، ہیں شاہ پری رنگیلی

بدرہ تے تُدھ ہک دوئی دی، ماؤ دا دُدھ پِیتا
ماں تیری نے نال اَساڈے، بھائی چارہ کیتا

حق تیرا ہُن سَاڈے اُتّے، ساڈے حق تیرے تے
ہوندے زور احسان مَروت، کِیتوئی نہیں میرے تے؟

میں پر اِیڈ مُصیبت گذری، باہر حد شماروں
رِہیوس قَید دیواں دی اندر، دور اپنے گھر باروں

ساک اشنایاں بھائی چارے، وَرتن بھاجی سارے
اِسّے کارن کر دی خَلقت، اوسر آون کارے

اوسر مِتر پرکھن ہوندا، وچ غریبی ناریں
دُدھل گاں ازماون ہوندی، پھگن ماہ بہاریں

اُوکِھے ویلے کاری آوے، بھلیاں دی اشنائی
اَڑیا آکھن دی لَج پالن، جو انسان وفائی

دنیا تے جو کم نہ آیا، اُوکھے سُوکھے ویلے
اُس بے فیضے سنگی کولوں، بہتر یار اکیلے

سُکھاں عیشاں موجاں اندر، ہر کوئی یار کہاندا
سنگی سو جو تنگی تک کے، بنے بھنجال دُکھاندا

کول ہووے تاخَیراں اندر، یار اشنا کہاوے
دُور مہم پیاں دُکھیاری، چِیتا منوں بھلاوے

اوڑک نفع ہوویگا کِتھوں، ایسے سنگ دو رنگوں
سَڑ دا یار تکے سَڑ جاوے، سنگ نسنگ پتنگوں

ہک بیڑی پر موجا ںمانے، وِیکھدیاں ہِک رُڑھدا
اُس رُڑھدے نوں پھڑ یوس ناہیں، داؤ جِیہدا سی پُڑدا

کاہدا سنگ محبت کیہی، کے ایسی اشنائی
مُویاں گیاں تُدھ یاد نہ کیتا، خوشئیں عمر لنگھائی

ماں میری دی دِھی کہاویں، بھینو نال سہیلی
اُوکِھے ویلے کم نہ آئی، اِیں ساڈا بھی رب بیلی

تیرے جیہی سہیلی ہووے، پری اصیل شہزادی
کے لائق اس بے وفائی، حدوں بہت زیادی

میں عاجز بے چاری ہوئی، رہی اچر وچ قَیداں
نہ کوئی بھائی چارہ، ڈِٹھا واقفیاں اَمیداں

قلزم دے شہزادے مینوں، رکھیا سی وچ بَندی
بندی دے سِر بَنی قہر دی، سخت مصیبت مندی

ماں پیؤ بھین بھرا وچھُنّے، سنگ سیاں تُدھ جِہیاں
پَیا وِچھوڑا دل دا چوڑا، سے پیڑاں سِر سہیاں

ہِک ہَکلی سُولیں سلھی، وِچھڑی سنگ قطاروں
کوکاں کوک قہر دی جِیونکر، تَرُٹی کونج اُڈاروں

تَلیاں پَھاٹاں ہتَھ مَروڑاں، ہوئی حیران نمانی
تَلیاں وچ کڑاہ غماں دے، جیوں مچھی بِن پانی

تنگ پِیوس کوئی سنگ نہ ساتھی، پھاتھی جا کُتھاویں
باپ میرے دی پیش نہ جاندی، سَو وَس لاوے بھاویں

وَس تیرے سی اوہ اُپرالا،جے توں آہر کریندی
قلزم دے شہزادے تائیں، فوجاں سَنے مریندی

باپ تیرے دا لشکر بھارا، ودّھ اس تھیں سَو حصہّ
تُسیں اساڈی مدّد کر دے، جَھب مُک جاندا قِصہ

باپ تیرے دے اگے بھینے، آہی گل سکھالی
جے ہک وار تیاری کردا، پریاں دیواں والی

قلزم دے دریا دے توڑی، فوجاں دے گٹ بَھجدے
دھونسے شتری ڈھول نقارے، طُرم طنبُورے وجدے

پریاں دے گھُنکارے پَیندے، دیو مریلے گَجدے
قلزم دے سر کر دے تک کے، یا ملدے یا بَھجدے

جس شاہزادے مینوں کھڑیا، جاں ایہ بازی ہردا
بانہہ میری پھڑ دِیندا اونویں، ماری وا کے کردا

تُساں اگے کُجھ چیز نہ آہے، دیو قلزم دے سارے
مار مَندال اوہناں نوں کردے، تُسیں میرے چُھٹکارے

خیر کسے پر دوس نہ کوئی، لِکھی سی درگاہوں
کِیتی بند خلاص میری بھی، ہویا کرم الہٰوں

ایہہ اُپرالا میرے والا، کَدی تساں تھیں ڈُھکدا
ستر کُرسی ساڈی توڑی، اِیڈ احسان نہ مُکدا

غیبوں ٹور مؤکل دِتا، مرد بھلا اخلاصی
آپ احسان کیتا رب والی، قیدوں ہوئی خلاصی

ظالم نفس دیوے دی قیدے، رب کیتا خصمانہ
غیبوں مِیل مؤکل دِتا، کامل پیر یگانہ

اُوسے توں میں گھول گھمائی، دَھن اوہ وِیر پیارا
اوہو بَابُل اوہو مائی، اوہو بھائی چارہ

اُوسے دا احسان مَروّت، اُوسے دی وَڈیائی
جس نے قید اَولیّ وِچوں، ہِمّت کر چَھڑکائی

بَھلا ہووے اُس مرد سچے دا، شالہ دوہیں جہانی
بہت پیار محبت کر کے، مِلس پیارا جانی

سُن کے گِلے اُلاہمے سچے، شاہ پری کملانی
عُذر بہانے کر کر کَہندی، سُن توں ملکہ رانی

باپ میرے نے بُہتی واری، کیتے سے سَمیانے
فوجاں سَنے تیار کرائے، سِر کردے مردانے

تیری لوڑ کرن دی خاطر، لشکر بہت چڑھائے
مرد زوراورجنگی خونی، ہر ہر طرف دوڑائے

مُلک ولایت ہور اُجاڑاں، وَسدے شہر لوڑائے
کِدھروں خبر نہ لبھی تیری، سَبھ گھریں مڑ آئے

خُشکی دے سبھ تھاں لوڑائے، کِدھروں پتہ نہ لگا
پر اِتروکے ماں میری سی، کر دی ایہہ اُسرگا

باپ میرے نوں کَہندی آہی، آ ہلک ڈِھلاں چھوڑو
وچ سمندر ٹاپو بندر، ملکہ تائیں لوڑو

دیواں پریاں دے ونڈ لشکر، ہر ٹاپو ول ٹورو
ڈھونڈو ملکہ بیٹی میری، نبی سلیماں سورو

کوقافاں دریاواں اندر، ڈھونڈ کرو جَگ سارے
ملکہ لبھے تاں رہ آوے، نہیں اسی ہتیارے

پَٹ اُلٹ پہاڑ جزیرے، ہؤو لوڑاؤ سبھے
پَت ساڈی ہن تاہیں رَہندی، جے مڑ ملکہ لبھے

بابل بھی اتروکے آہا، ساعت روز تکیندا
طلباں خرچ مہم گھلن دا، لشکر تائیں دَیندا

راکس دیو عفریت ہزاراں، کردے سان تیاری
ہُن تینوں رب آپ لیاندا، لطف ہویا سرکاری

نہ احسان مَروت ساڈے، نہیں کسے دے بھارے
ہک احسان اوسے دا ایہ بھی، جس دے اگلے سارے

ملکہ کہندی آہو میں تے، لطف کیتا رب آپے
لیکن ہک سبب بنائیوس، تاں چُک گئے سیاپے

شاہ پری پھر کَہندی ملکہ، چھوڑ نہورے بہئو کھاں
کے سبب بنایا مولیٰ، سچ اسانوں کہو کھاں

ملکہ خاتوں کہے پری نُوں، کے گل دَساں تینوں
مصر شہر دا ہِک شہزادہ، اوس چھُڑایا مینوں

پھیر بدیع جمال پری نوں، چَمک لگی اِس گلوں
کون کوئی شاہزادہ ایسا، آیا ہے کِت ولّوں

غیرت غصہّ کھادِلے وچ، پُچھدی ملکہ تائیں
کون شاہزادہ کیسا جِیہڑا، گیا اجِیہّاں جائیں

پریاں تے عفریت مریلے، راکس دیو بہادر
اوس قلعے وچ جاون جوگا، نہیں کسے دا بادر

آدمیاں تے جِناں وچوں، جو جو لوک قد آور
اس گِردے وچ پہنچ نہ سکدے، جے سوہون زوراور

باشک ناگ سنسار وڈیرے، مچھ سمندر والے
اس گِردے وچ پُہنچ نہ سَکدے، نہ پنکھی پروالے

کے مہم بنی شاہزادے، ایسی بھاری کائی
کِس آفت نے چالیاندا، جاوڑیا اُس جائی

دَھن دلیری گَھنی گَھنیری، سُنی زبانی تیری
ایسا مرد اپرادھی کہڑا، دَس سہیلی میری

ملکہ خاتوں کہندی اگوں، دَساں گی تَک وِیلا
محرم گل دا محرم کرئے، جس دم ملے اکیلا

عاماں بے اخلاصاں اندر، خاصاں دی گل کرنی
مِٹھی کھیر پکا محمد، کُتیاں اگے دھرنی

عاشق دی مَعشوقاں اگے، چَوری عرض پُچائیے
باجھ پِیّا تھیںبِھیت سَجن دا، ہوراں نہیں سنائیے