دیہں اے ویہدے پَے ہاٸیں

کملی خلقت واجے پھوکے
جاہ جاہ کنجری بُھکھ پٸی نچّے
سارے دیس دی رہتل کوہڑی
کس گل دا جی مانڑ کریوے
چٹا دیہں اے ویہدے پَے ہاٸیں

او ہک ملاں ٹھرک پیا جھاڑے
وعظ پیا دیوے شرم دھرم دا
آپنڑے ناں دا ٹیگ لوا کے
سستے نالے ماہنگے ویچے
ننگا دیہں اے ویہدے پَے ہاٸیں

دھرتی ماں دی چولی پاٹی
او جرنیلاں دی ستھنڑ لتھی
پونڑی صدی توں ریپ پَے کردن
قانون اساڈا مٹھ پیا مارے
بھیڑا دیہں اے ویہدے پَے ہاٸیں

آٸے ہن ملکھ نوں راج ہلارے
چھنڑچھنڑ دے جاں پیر دے کارے
سانوں لٹ لٹ رج رج کھاونڑ
پارلیمان دے باندر سارے
بھکھا دیہں اے ویہدے پَے ہاٸیں

کٸی ماواں دے لال کوہی گٸے
کٸی دھیاں دے مانڑ کھڑی گٸے
سنگ جیناں دے راہیں پیاں پٹنڑ
ہاٸے اوناں دی رَت پیا پیوے
تسا دیہں اے ویہدے پَے ہاٸیں

کینہہ شہراں دی اربت پٹی ؟
کینہہ جنگلاں نوں ساڑ دُھکھایا ؟
کینہہ دریا نوں سیم بنڑایا ؟
کینہہ صحرا وچ ملکھ مرایا ؟
ڈاھڈا دیہں اے ویہدے پَے ہاٸیں

کیوں ہر پاسے بھکھ تے ننگ اے ؟
کیوں غربت دے وینڑ پَے ہوون؟
کی رہ گٸی اے پہچانڑ اساڈی ؟
کیوں جیونڑ دے سبھ رنگ کوجھے ؟
چٹا دیہں اے ویہدے پَے ہاٸیں