موت دا چیتر

موت دا چیتر
(بھگت سنگھ تے اودے بیلیاں کانڑ)

چیتر چیترے
دیہں دی کِھنڈی ہوٸی چھاتی تے
رنگاں تے خشبواں دے شوقی
ساڈے جواناں کانڑ
پھاسی دے پھندے
تے دیہں دی چھاتی وچوں
موت رِسنڑ لگ پٸی
اساں حیاتی نوں سد مارے
تے ساڈیاں آوازاں
لہو دی ڈَل بنڑ گٸیاں

موت چار جواناں دی نٸیں
موت اوناں وچاراں دی
جیہڑے ساڈے آپنڑے آپ نوں
اوستا دیندن آپنڑا آپ نتارنڑ دی
موت رنگاں تے خشبواں دے روپ دی
گیتاں تے پیار پریت دے خواباں دے میل دی
موت حیاتی دے سوہنڑ دی
اسی اج ناہوند دی خاک بنڑ گٸے ہاٸیں
ناخواندہ اج تے ظلم دی بھٹھی وچ سڑدا ہویا کَل
ایہو کجھ تاں ہے ساڈے جیونڑ دی جھولی وچ
اسی موت دا ہاسا تے حیاتی دا موکالا!
ساڈا آپنڑا آپ پھاٸے لایا گیاٸے

ساڈیاں موٸیاں آساں دے ہڈ لے کے
کتنے چیتر لیہہ گٸے
تریخ دے کالے کھوہ وچ
ویلا جانڑداٸے
پر اس بیری تے کوکدیاں
چڑیاں نوں خبر ہے یا نٸیں ؟
میرے لہو وچ جُھرجُھری پوندی اے
تے میں چپ دے سول تے
مرجھیا ہویا پُھل بنڑیا رہ جاندا ہاں