7
خ خبر ہوئی رانی اِچھراں نوں
جس جایا پُورن پُت سائی
چوڑا بھنّ کے توڑ حمیل سُٹّی
بھر بُک رانی سِر خاک پائی
مندے گھاء پیاریاں پُتراں دے،
رانی بھج کے راجے دے پاس آئی
قادریار کھڑو پُکار کردی،
ایہدے نال کیہ راجیا وَیر سائی
8
د دُور ہو رانیے کہے آپ راجا
ایہدے نال گواوساں مار تینوں،
کہے وار بدکار نے جمّیو ای،
جس جمدیاں لایا ای داغ مینوں
جِنہاں وچ حیاء نہ شرم ہووے،
ایسے پُتر تاں جمیے پھیر کَیہنوں
قادریار کہندا سلواہن راجا،
تُد دسدا جے تسی ورو ایہنوں
9
ذ ذرا نہ راجیا گلّ سچی،
جیہڑی گلّ دا بھرم وچاریا ای
کہندی اِچھراں کملیا ہوش کرتوں،
اینویں کُوڑ تریمتے ماریا ای
آکھے لگّ رنّاں ہتیاریاں دے،
کرم آپنا میتھوں ہاریا ای
قادریار راجے سلواہن اگے،
رانی اِچھراں جاء پکاریا ای
10
ر رہے نہ ورجیا مُول راجا،
اوسے وقت جلاد سداوندا ای
لگے رون دیوان وزیر کھلے،
دل راجے دے ترس نہ آوندا ای
ایہدے ہتھ تے پیر آزاد کرو،
راجا مُکھ توں ایہہ فرماوندا ای
قادریار کھلو کے ماؤں تائیں،
پُورن بھگت سلام بلاوندا ای
11
ز زور نہ ڈاڈھے دے نال کوئی،
پکڑ بے گناہ منگایا میں
کیہنوں کھول کے دل دا حالَ دساں
جیہڑا گھات گناہ کرایا میں
میں تاں جھورنا آپنے طالیا نوں،
ایہو لیکھ نصیب لکھایا میں
قادریار پُورن بھگت آکھے،
ماں ماتری چور بنایا میں
12
س سمجھِ راجا بُدھ ہار ناہیں،
کہندی اِچھراں واسطہ پا کے جی
امب وڈھ کے اَکّ نوں واڑ دیویں،
پچھوتاویں گا وقت وِہاء کے جی
بوٹا آپنا آپ پٹان لگوں،
جڑاں مُڈّھ تائیں اُکراء کے جی
قادریار جے پُورن نوں ماریو ای،
باپ کون بلائے گا آء کے جی
13
ش شکل نہ راجے دی نرم ہوئی،
قہروان ہو کے کہندا نال غصے
باہر جا کے چِیرو حلال خورو،
چھنّے رتّو پاؤ جیہڑی وچ جُثے
ایہدے ہتھ سہکاء کے وڈھیو جے،
وانگ بکرے دے ایہدی جان کُسّے
قادریار جاں راجے دا حکم ہویا،
پکڑ لیا جلاداں نے وقت اُسے
14
ص صاحب توں لِکھیا لیکھ ایویں،
پُورن بھگت نوں لے جلاد چلّے
کندھاں کالیاں شہر ہڑتال ہوئی،
پاس رون وزیر دیوان کھلے
تدوں غشی آئی رانی اِچھراں نوں،
جان نکل نہ جاوندی کسے گلّے
قادریار میاں ماواں پُتراں نوں،
لُونا ماریا کفر دے جھاڑ پلّے
15
ض ضامنی دے چھڈاونی ہاں،
لُونا لکھ کے بھیجیا خط چوری
پُتر بنن لگوں میرا پورنا وے،
دیکھ کیہی میں دِتّی آ ماؤں لوری
آکھے لگ میرے اجے ہئی ویلا،
اِسے وقت چھڈاوساں نال زوری
قادریار کیوں جان گواونا ہیں،
لاء دینی ہاں تُہمتاں ول ہوری
16
ط طرف خدائی دے جِند دینی،
پُورن آکھدا وت نہ آونا ای
آخر جیوئیے لکھ ہزار برساں
انت پھیر مائے مر جاؤنا ای
خط واچ کے پُورن نے لب سُٹی،
کیہڑی گل توں دھرم گواونا ای
قادریار ان ہوندِیاں کرن جیہڑے،
آخر پھیر اوہناں پچھوتاؤنا ای
17
ظ ظلم کیتا مائی ماترے نی،
پُورن آکھدا پوری نہ پوے تیری
مندا گھات کمایو ای نال میرے،
دھرم ہاریا تُدھ دلیل پھیری
جیہڑی بنی مینوں سِر جالساں میں،
مر جائےگی روندڑی مائی میری
قادریار جلاداں نوں کہے پُورن،
مل لین دیو مینوں اِک ویری
18
ع عرض کیتی شرما راجے،
کر ترس جلاد کھلووندے نی
رانی اِچھراں تے پُورن بھگت اوتھے،
جاندی وار دوویں مِل رووندے نی
آہیں ڈولھ کے رت دا نیر اوتھے،
دِلوں حِرص جہان دی دھووندے نی
قادریار جلاد جاں پئے کاہلے
ایویں ماں پُتر وِداع ہووندے نی
19
غ غم کھادا رانی ہوئی انّھی،
آہیں ماردی رب دے دیکھ بُوہے،
پُتر پکڑ بگانیاں ماپیاں دے،
پُورن بھگت نوں لے گئے باہر جُوہے
اوہدے ہتھ تے پیر ازاد کرے،
تُرت لوتھ وگاوندے وچ کُھوہے
قادریار آ لُونا نوں دین رتو،
ویکھ لاوندی ہار شنگار سُوہے
