بیٹھ ذرا میں اکھ دی باری بھیڑ دیاں
فیر ہوٹھاں تےراگ پہاڑی چھیڑ دیاں
تیرے لئی تے بُن بُن جھلیا رکھے سی
ہن کہناں ایں سارے خواب اُدھیڑ دیاں
نیواں ہاں تے نیویں پاسے بیٹھا ہاں
تیرے پاسے کِنج حیاتی ریہڑ دیاں
گھم رہیا ہے رُک رُک چکّا ساہواں دا
وَس چلے تے اِکو واری گیڑ دیاں
میں چاہنا واں حالی وقت لنگھا لئیے
توں چاہنا ایں ساری ہُنے نبیڑ دیاں
حوالہ: اک خیال سمندروں ڈونگھا، صغیر تبسم؛ پرنٹ میڈیا پبلی کیشنز لاہور 2022؛ صفحہ 17 ( ویکھو )
