تیرے شعراں چوں

تیرے شعراں چوں
بُو آرہی اے
جنگلی سُوراں دے ماس تے سستی شراب دی
میں تیری پہلی نظم پڑھی سی
نہیں.......!
معافی چاہناں
سگوں سُنی سی
تے
اِنج لگیا سی جویں
تیرے گمنام ہوٹھاں دے باریک ورقیاں تے لِیک وجی اے
کسی پرانی کتاب دی
بے وقت دی شام دی لالی توں ڈر لگے
تے کدی
شیشا ویکھیں
اک، دو، تِن، چار نہیں
رنگاں دا کھلار نظر آوے گا
کِتے پیلا کِتے نیلا سمندراں دے زہر ورگا
کِتے لال کِتے کالا جنگلاں دے قہر ورگا
ست رنگے پھلاں نوں کون چھڈدا ہے
اک زمانہ چُمدا ہے
گلے دا ہار مِتھدا ہے
گل تے بے رنگے دی ہے
بے رنگے ہتھ ہوون
تے
شگناں دی مہندی لان لئی
کسے دا لہو نہیں کڈھی دا
کسے دا ہتھ نہیں وڈھی دا
میں تینوں
تیرے ترکھے نک دے کوکے توں سال پہلے دا جاننا واں
اوہدوں توں صاف ہسدی سیں
اوہدوں اوہ کول بہندا سی
اوہدوں توں دُور نسدی سیں
تیریاں صندلی بانہواں دیاں چُوڑیاں ٹُٹن دا دُکھ
وڈا دُکھ اے
پر ایہدا مطلب رُک جانا تے نہیں ناں
پرانے کِکراں دیاں ٹہنیاں طرح سُک جانا تے نہیں ناں
خیر چھڈو
تہاڈی اپنی ذندگی اے
تساں نے آپ جینی ہے
جو دل آئے کرو
پر شعر......!
قسم اے شاہ حسین دیاں کافیاں دی
گھر دے نیانیاں طرح ہوندا اے
لے کے پالن تے کُکھوں جمن چے فرق ہوندا اے.........!