ٹھہر ذرا سوچ والی چرخی گھمان دے
کون ایں تے کیہ ایں توں ذہن تے لڑان دے
ہور کِتے ویکھیں گا تے شعر بھل جائیں گا
میرے ول ویکھ میرے شعراں تے دھیان دے
رُوح تک آ گیا ہنیر ایس رات دا
تھوڑی جئی روشنی تے میرے وَل آن دے
جنگ دی نہ گل کر جنگ حالی رہن دے
پیار والا گیت مینوں پیار نال گان دے
ماڑے آں تے کوئی نہیں، ساڈا وی تے جی اے
کدی کدی دل والی سانوں وی سنان دے
پنڈ نال پیار اے تے پنڈ وچ بیٹھے آں
شہراں تک پہنچ گئے نیں کئی میرے ہان دے
حوالہ: اک خیال سمندروں ڈونگھا، صغیر تبسم؛ پرنٹ میڈیا پبلی کیشنز لاہور 2022؛ صفحہ 47 ( ویکھو )
