روز میں تارا تارا گِن کے
رات بتاؤندا ہاں
روز میں تیرے سِر توں سورج
وار کے آؤندا ہاں

جد روہِیاں وِچ پنچھی تڑکے
واک کوئی لیندا ہے
میں آپنے سنگ سُتا اپنا
گیت جگاؤندا ہاں

فِر جد مینوں سورج گھر دے
موڑ تے مِلدا ہے
ندیئے روز نہاون
اوہدے نال میں جاندا ہاں
میں تے سورج جدوں نہا کے
گھر نوں مُڑ دے ہاں
میں سورج لئی ویہڑے نِم دا
پِیڑھا ڈاہندا ہاں

میں تے سورج بیٹھ کے جد فِر
گلّاں کردے ہاں
میں سورج نُوں تیری چھاں دی
گل سناؤندا ہاں

چھاں دی گل سناوندا جد میں
کمبن لگدا ہاں
میں سورج دے گورے گل وِچ
باہواں پاؤندا ہاں

فِر جد سورج میرے گھر دی
کندھ اُتردا ہے
میں آپنے ہی پرچھاویں توں
ڈر ڈر جاندا ہاں

میں تے سورج گھر دے مُڑ
پِچھواڑے جاندے ہاں
میں اوہنوں اپنے گھر دی
موئی دُھپ وکھاؤندا ہاں

جد سورج میری موئی دُھپ لئی
اکھیاں بھر دا ہے
میں سورج نُوں گل وِچ لے کے
چُپ کراؤندا ہاں

میں تے سورج فیر چُپ چپیتے
تُردے جاندے ہاں

روز میں اوہنوں پِنڈ دی جُوہ تک
ٹور کے آؤندا ہاں

روز اُداسا سورج ندیئے
ڈُب کے مردا ہے
تے میں روز مرے ہوئے دِن دا
سوگ مناؤندا ہاں

حوالہ: کلامِ شِو؛ سانجھ؛ 2017؛ صفحہ 500 ( ویکھو )