دل دا مینوں پھٹّ وکھاؤنا آؤندا نئیں
غیراں تائیں حال سناؤنا آؤندا نئیں
آپنے گھر وچ آپے چوری ہو گیا میں
ہور کسے نوں چور بناؤنا آؤندا نئیں
لکھاں ہیراں وسدیاں ایتھے پر مینوں
جوگی والا بھیس وٹاؤنا آؤندا نئیں
اک دا ہووے جُرم تے میں سمجھا دیواں
ویہڑے نوں تے اِنج سمجھاؤنا آؤندا نئیں
اوہدیاں یاداں نال میں دل پرچا لیندا
ڈاروں وِچھڑ کے کرلاؤنا آؤندا نئیں
صدف نے تیرے ناویں سبھ کجھ لا دِتا
نچّ کے مینوں یار مناؤنا آؤندا نئیں
