لگے دُکھّ حیاتی نال ہنڈھاؤندے پئے آں
کچھڑ چکّ کے بالاں وانگ کھڈاؤندے پئے آں
نین پیاسے ترس گئے دیدار نہ ہویا
ہنجھوآں دے سنگ دل آپنا پرچاؤندے پئے آں
ڈُبّ گیا دن پھیر نہ سجن نیڑے آیا
بنے اُتے بیٹھے کانگ اُڈاؤندے پئے آں
ہر بندا ای اک دُوجے دا ویری دِسّے
اسیں تے نفرت والی اگّ بُجھاؤندے پئے آں
گُھمن گھیری دے وچ بیڑی پھس گئی ساڈی
ککھاں نوں ہتھ پا کے جان بچاؤندے پئے آں
بھلن نہ اوہ ہجر سمیں دیاں کالیاں راتاں
جھوٹھے لارے لا کے دل پرچاؤندے پئے آں
صدف نوں مار گئے نے تیرے بول ایہہ مِٹھے
ایسے آس تے کیتے کول نبھاؤندے پئے آں
