زبانوں بول چھڈیاں دا
مکانوں کھول چھڈیاں دا
دھگانے رول چھڈیاں دا
ہنیرے تول چھڈیاں دا
کِسے لیکھا تے لیناں اے
بری دولت کماون دا
بناں سمجھے لٹاون دا
بنایاں نوں مٹاون دا
کلا سُتی جگاون دا
کسے لیکھا تے لیناں اے
گڑے مردے اکھاڑن دا
غریباں نوں لتاڑن دا
بھرے ویہڑے اُجاڑن دا
تے لسیاں نوں پچھاڑن دا
کِسے لیکھا تے لیناں اے
کسے دے عیب دسن دا
کسے ماڑے تے ہسن دا
بناں گرجے ای وسن دا
چھڈ کے ہتھ نسن دا
کسے لیکھا تے لیناں اے
حوالہ: پوہ وچ پوے پھوہار، زاہد جرپالوی؛ سانجھ لاہور؛ صفحہ 33 ( ویکھو )
