ورھ نہ بدلا، ورھ نہ بدلا، ورھ نہ بدلا ورھ
نہ کندھاں ڈھا اساڈیاں
نہ ویہڑے تلکن کر
سب کچے آل دوالڑے
بن رحمت رب دی ورھ
چڑھ چھتّاں لوک نہاوندے
سانوں چھت ڈھیہن دا ڈر
ورھ نہ بدلا ورھ
ساڈے آس کھیت کلر اٹھرے
چھیتی ایہ جاندے بھر
نال آساں دیاں بوٹیاں
سفنے وی جانے تر
اگے ای بھیڑے لیکھ نے
لیکھاں توں جانا ہر
ورھ نہ بدلا ورھ
پکے جنہاں دے کوٹھرے
اوہناں سون وی جانا جر
اساں ساون کِنج ہنڈاونا
کچے اساڈے گھر
اج جیبھاں ورد پکاؤندیاں
وچ سجدے ساڈے سر
ورھ نہ بدلا ورھ
وچ ہڑھ سیلاباں ساڈڑے
رُڑھ جانے مال تے زر
اک کریئے رت پسینڑا
تے تاں بن دے نیں گھر
جے گھر اساڈے ڈھیہہ گئے
نال اساں وی جانا مر
ورھ نہ بدلا ورھ
حوالہ: پوہ وچ پوے پھوہار، زاہد جرپالوی؛ سانجھ لاہور؛ صفحہ 42 ( ویکھو )
