جِندڑیے

جِندڑیے!
آ کِھڑ کِھڑ رویے
تے مار دو ہتھر ہسیے

ایہ جِیوَن نہیں ساڈا جِیوَن
رُوح دی جونے وسیے

بِین وجا او جوگیا
کیوں لاؤنا اے دیر
شُوکن ساہ سپُولیے
دِل نوں پے جائے گھیر
بھرجاں نال کُڑتّناں
جِند نوں آکھاں فیر
اپنی ناگن جِبھ نُوں
اکِّھیاں دے وچ پھیر
اسیں وی تیرے چیلڑے
گُگے پِیر نوں دسیے
تے مار دو ہتھڑ ہسیے

عُمراں جِنے پَندھ نیں
ساہواں دے وِچکار
کدی تے آکے سُورجا
بلدا سینہ ٹھار
اکِّھیں سُرمہ زہریا
بَلّھیں چُپ دا ہار
سمیا جِیوَن جوگیا
تھاں ای دِتّاۓ مار

لاشاں جِندے وَیر نے
موڈھیں چُک کے نسیے
تے مار دو ہتھڑ ہسیے
جِندڑیۓ!
آ کِھڑ کِھڑ رویے