اُچیاں ٹبیاں تے.....

(1)
اُچیاں ٹِبیاں تے میں بیٹھا
مُٹِھیوں دُھوڑ اُڈاواں
مُٹِھیوں کِرکے میں وی کِدھرے
دُور کِتے اُڈ جاواں
کِسے بسنتی پُھل دی چادر
تے جا کے سوں جاواں
ہرے کچور پتّر دے تبکے
نیناں وچ ڈِگاواں
عُمراں دی میں پیاس مٹاواں
تے ہریاں ہو جاواں
اُچیاں ٹبیاں تے۔۔۔

(2)
اُچیاں ٹِبیاں تے میں بیٹھا
مُٹھیوں دُھوڑ اُڈاواں
مُٹھیوں کِرکے میں کدھرے
دُور کِتے اُڈ جاواں
اُڈ کِسے عاشق دی قبرے
میں جا کے بہ جاواں
پِھکی مہندی والے ہتھ دے،
پائے چول میں کھاواں
ٹُٹی چَنجھ نال کڈھ دو قبراں
دوہاں وِچ سوں جاواں
اُچیاں ٹِبیاں تے۔۔۔۔

(3)
اُچیاں ٹبیاں تے میں بیٹھا
مُٹھیوں دُھوڑ اُڈاواں
مُٹھیوں کِرکے میں وی کدھرے
دُور کِتے اُڈ جاواں
کسے جوگی دے موڈھیں بہ کے
پردیساں ول جاواں
اُس جوگی دے تِلک دی سُرخی
نیلے ہوٹِھیں لاواں
اُس سُرخی نال سُورج بالاں
جِیون نُوں رُشناواں
اُچیاں ٹِبیاں تے۔۔۔۔۔