اُجڑی جھوک وسا
سائیں!
ساڈی اُجڑی جھوک وسا
پئی بلدی ہر تھاں بھا
سائیں!
ساڈی اُجڑی جھوک وسا
اسیں لکّھاں ایکڑ بِیجے
ساڈا فیر وی مندا حال
ساڈی مَجھیں بادی ہو گئی
ساڈے وچ بھڑولے کال
ساڈے ویڑھے سُنّے ہو گئے
ہر پاسے اُگیا گھاء
سائیں!
ساڈی اُجڑی جھوک وسا
اسیں وچ خلاواں وسّیے
تے لوبھاں ساڈا دیش
اسیں آپو آپ تاں منگتے
باہر کھڑے درویش
اسیں اکّھیں مکّھی ویکھ کے
چُپ کرکے لئیے کھا
سائیں!
ساڈی اُجڑی جھوک وسا
حوالہ: نال سجن دے رہیے، افضل ساحر؛ سانجھ لاہور 2011؛ صفحہ 27 ( ویکھو )
