منہ آئی بات نہ رہندی اے

مُونہہ آئی بات نہ رہندی ہے

جھوٹھ آکھاں تے کجھ بچدا ہے
سچ آکھیاں بھانبڑ مچدا ہے
جی دوہاں گلّاں توں جچدا ہے
جچ جچ کے جِیبھا کہندی ہے

مُونہہ آئی بات نہ رہندی ہے

جس پایا بھیت قلندر دا
راہ کھوجیا اپنے اندر دا
اوہ واسی ہے سُکھ مندر دا
جِتھے کوئی نہ چڑھدی لہندی ہے

مُونہہ آئی بات نہ رہندی ہے

اک لازم بات ادب دی ہے
سانوں بات ملومی سبھ دی ہے
ہَر ہَر وچ صورت رب دی ہے
کِتے ظاہر، کِتے چھپیندی ہے

مونہہ آئی بات نہ رہندی ہے

ایتھے دنیا وچ انھیرا ہے
ایہ تِلکن بازی ویہڑا ہے
وڑ اندر ویکھو کیہڑا ہے
کیوں خلقت باہر ڈھوڈیندی ہے

مونہہ آئی بات نہ رہندی ہے

ایتھے لیکھا پاؤں پسارا ہے
ایہدا وکھرا بھیت نیارا ہے
اِک صورت دا چمکارا ہے
جیوں چِنگ دارُو وچ پیندی ہے

مونہہ آئی بات نہ رہندی اے

کِتے ناز ادا دِکھلائیدا
کِتے ہو رسول مِلائیدا
کِتے عاشق بن بن آئیدا
کِتے جان جدائی سہندی ہے

مونہہ آئی بات نہ رہندی اے

جدوں ظاہر ہوئے نُور ہوری
جل گئے پہاڑ کوہ طُور ہوری
تدوں دار چڑھے منصُور ہوری
اوتھے شیخی مینڈی نہ تینڈی ہے

مونہہ آئی بات نہ رہندی اے

جے ظاہر کراں اسرار تائیں
سبھ بُھل جاون تکرار تائیں
پھر مارن بُلّھے یار تائیں
ایتھے مخفی گل سوہیندی ہے

مونہہ آئی بات نہ رہندی اے

اساں پڑھیا علم تحقیقی ہے
اوتھے اِکّو حرف حقیقی ہے
ہور جھگڑا سبھ ودھیکی ہے
اینویں رولا پا پا بہندی ہے

مونہہ آئی بات نہ رہندی ہے

اے شاہِ عقل توں آیا کر
سانوں ادب آداب سکھایا کر
میں جُھوٹھی نوں سمجھایا کر
جو مُورکھ ماہنوں کہندی ہے

مونہہ آئی بات نہ رہندی ہے

واہ وا قدررت بے پرواہی ہے
دیوے قیدی دے سر شاہی ہے
ایسا بیٹا جایا مائی ہے
سبھ کلمہ اُس دا کہندی ہے

مونہہ آئی بات نہ رہندی ہے

اُس عاجز دا کیہ حیلہ ہے
رنگ زرد تے مُکھڑا پیلا ہے
جِتّھے آپے آپ وسیلہ ہے
اوتھے کیہ عدالت کہندی ہے

مونہہ آئی بات نہ رہندی اے

بُلّھا شَوہ اساں تھیں وکھ نہیں
بِن شَوہ تھیں دُوجا ککھ نہیں
پر ویکھن والی اکھّ نہیں
تاں ہی جان پئی دُکھ سہندی ہے

مونہہ آئی بات نہ رہندی اے