تیرے زخم ورگی ملی نہ کوئی مرہم
تیرے درد جیہی نہ کوئی دوا دیکھی
تیرا ذکر دکھاں دا علاج ڈٹھا
تیرا ناں روگاں دی شفا دیکھی
جے نہ عشقَ تیرے دی امان منگدا
بندی دار دلدار منصور دی نہ
تیغ سیس سرمد دا لاہن والی
تیتھوں بنی اوہدی دل ربا دیکھی
تیری گلّ دے اثر توں رہے لیندے
درس زندگی دا الیاس ورگے
تیرے پیار دی ٹور وچ ظلمتاں دے
خضر ورگیاں دی رہنما دیکھی
تیرے کسے طالب جد آواز دتی
سورج منزلاں ماردا پرت آیا
سینے زخم محبت دا لان دے لئی
چن تیری انگل دی ادا دیکھی
باغ وچ جا کے نرگس وانگراں اوہ
پیچ سمبل دی زلف دے ویکھدے نے
تیری گلی وچ مہکدی وانگ پھلاں
جنہاں سدا بہار ہوا دیکھی
تیرے پیراں نوں چمدیاں سار اوہنوں
حرم پاک دا مرتبہ پھیر ملیا
ویہڑے وچ جیہڑے آپ کئی صدیاں
رونق بتاں نے کعبے دی لا دیکھی
توں کشکول جس منگتے دا پوریا چا
سر تے اوس دے رکھیا تاج دنیا
تخت شاہی اوہدے پیراں ہیٹھ آیا
سردل تیرے در دی جس گدا دیکھی
تینوں ویکھ تیرے ویکھن والیاں نے
جدوں اپنے آپ وچ نظر ماری
نہ کوئی گناہ گاراں نے گناہ ڈٹھا
نہ خطا کاراں کوئی خطا دیکھی
ستمگار زبان دراز تیتھوں
بدلہ نیک دعا دا ریہا لیندا
بدلے ویر دے ویری نوں پیار ملیا
بخشی تیرے مجرم دی سزا دیکھی
فانی زندگی نوں کیوں نہ گلوں لاہندے
ابدی زندگی دی دولت لین والے
تیرے وار نے واریا شیش جنہاں
ٹلدی اوہناں دے سروں قضاء دیکھی
تیرے ربّ کولوں دو جہان اندر
اچے مرتبے ملے 'فقیر' تینوں
تیرا قول کلام خدا دا اے
امر ربّ دا تیری رضا دیکھی
