رانجھا جوگی، متوں مرزا، پنوں مجنوں جھلا
آپو اپنی دنیا دا اے خالق کلا کلا
دیوے وچ حیاتی والے بالن ساڈی مٹی
کنی نال جنہاں دی بجھا پیار اساڈا پلہ
لے کے دل اوہناں نے سانوں دتی دولت غم دی
جھونکے دے وچ مل گیا سانوں سودا خوب سولاّ
غم تیرے بیاسے دل نوں دتا سدا سہارا
غم تیرے دے ہندیاں ماراں خوشیاں دے سر کھلا
دل دیاں ریجھاں لاہ لاہ اﷲ سوہنے بتّ بنائے
ویکھ بتاں ول کیوں نہ مونہوں نکلے اﷲ اﷲ
اوسے وانگر یاد اوہدی دے نال اے نبھدی جاندی
ایویں لوکی آکھن نہیں اے نبھدا پیار کولاّ
ایویں لبھدی پھرے نہ دنیا دکھ محبت والے
دنیا دے سکھاں تھیں رکھے دکھ پیار سکھلا
ٹر کے نال بندے دے ٹردے نال نہ سنگی ساتھی
سنگاں ساتھاں دے وچ ٹردا بندہ کلم کلاّ
کھیڈن لفظاں نال فقیر ہر ویلے سوچ وچاراں
کجھ اے قلم نچلی میری کجھ خیال نچلا
