دل میرا نہیں میرا ہے بیگانہ کسے دا
میں ایہدا ہاں دیوانہ ایہہ دیوانہ کسے دا
درد اپنا کتھے تے کتھے پیڑ پرائی
اپنی نہیں اک کوڈی جیہا آنا کسے دا
ٹردے نوں سکھاندا اے پئی پندھ دی دوری
ہٹھّ ہووے کدی جے ذرا مردانہ کسے دا
چبھدی سی تیرے دل نوں کسے دی جے امیری
جر ویکھ کے ہن حالَ غریبانہ کسے دا
دیکھی نہ گئی ہسی ہوئی شکل کسے دی
ڈٹھا نہ گیا حالَ فقیرانہ کسے دا
گھر میرے دی ویرانی تے ویرانی اے گھر دی
پر مجنوں دا ویرانہ سی ویرانہ کسے دا
نہ عشقَ میرا اے تے نہ میری اے جوانی
مستی ایہہ کسے دی اے تے میخانہ کسے دا
دل دی نہ سڑن ہندی اے مٹھی کدے اک پل
سڑدا اے شمع وانگ ایہہ پروانہ کسے دا
ہر وار جد میں اوس نوں پچھیا تاں کیہا اوس
ایہہ مطلبی دیوانہ اے دیوانہ کسے دا
شوق اپنا اپنا اے تے چاہ اپنی اپنی
مستانہ کسے دا کوئی مستانہ کسے دا
پت جھڑ وچ ایہہ سنیا اے میں بلبل دی سداؤں
اجڑے نہ کدی وس جے مڑ کھانہ کسے دا
اک ڈاڈھی طلسمات اے جادوگر اے دنیاں
جناں دی ایہہ وستی اے پری خانہ کسے دا
ہر اک دا ٹکانا اے فقیر ہر دا ٹکانا
نہ کعبہ اے کسے دا نہ بت خانہ کسے دا
