رہندا نظر وچ اے تیرے طالباں دی

رہندا نظر وچ اے تیرے طالباں دی
سدا سوہنیا پتہ مقام تیرا
کعبہ گھر تیرا، ویہڑھا حرم تیرا
فلک چھت تیرا عرش بام تیرا

ہے شفاعت تیری دا محتاج محشر
جاری وچ دنیا فیض عام تیرا
کیہڑا تیرا غلام سلطان ناہیں
کیہڑا نہیں سلطان غلام تیرا

رنداں وانگ صوفی ساقی مست تیرے
جنہاں دیکھیا مست خرام تیرا
چلدا میکدے وچ توحید دے رہے
بھریا مے توحید دا جام تیرا

ڈٹھا وانگ تسبیح دیاں دانیاں دے
بنیا مقتدی اے ہر امام تیرا
عالم علم حکمت دیاں وچ درساں
دندا رہے گا درس مدام تیرا

دھاڑے مار خونی ظالم جابراں لئی
ہویا خلق عظیم انعام تیرا
وگدا در دریاواں دے زور اتے
ڈٹھا جگّ نے زور وریام تیرا

کرکے ورد خالق مخلوق دے لئی
کیتا فرض درود سلام تیرا
چھاپ وچ دل دی اے فقیر رہندا
جڑیا وانگ نگینے دے نام تیرا