دُھپاں لوواں ہس کے جہڑے سہہ جاندے

دُھپاں لوواں ہس کے جہڑے سہہ جاندے
ککر اونہاں پیراں تھلے گہہ جاندے

سنگت نال جو موڈھے جوڑ کے ٹر دے ناں
دوڑ زمانے دی وچ پِچھے رہ جاندے

ویکھ کے ہردے پُریاں توں نہ بنھ پائے
دریاواں دے لاگے دے پنڈ بہہ جاندے

سچے موتی اوڑک لبھدے اوہناں توں
جیہڑے چھالاں مار سمندر تہہ جاندے

بازاں دی یاری ناں پھبدی گرجھاں نال
بھورناں چھڈ کے پُھل اکاں تے بہہ جاندے

ویلے دی جے قدر نہ کیتی ریجھاں نال
شکر دوپہرے رُس کے سورج لہہ جاندے

دُکھاں دا کیوں ستھر شوکت پایا ای
دل چھڈیاں تے چھیتی قبرے لہہ جاندے