دِنے رات ایخو دعا منگناں ہاں

دِنے رات ایخو دعا منگناں ہاں
مدینے چہ اپنی قضا منگناں ہاں

نہ طالب زمانے دی رنگینیاں دا
نظارا سدا روضے دا منگناں ہاں

سفر منگناں ہاں مدینے دی راہ دا
تے عشق نبی رہنما منگناں ہاں

لگے نال سینے دے روضے دی جالی
ایہہ فرقت دے غم دی دعا منگناں ہاں

اُڑا کے جولے جائے پل وچہ مدینے
میں اوہ کرماں والی ہوا منگناں ہاں

ظہوری ایہہ سب نالوں وڈی دعا اے
خدا کولوں اوہدی رضا منگناں ہاں

حوالہ: کتھے تیری ثناء، صفحہ 46 ( ویکھو )