قرآن دسدا اے بڑائی حضورﷺ دی

قرآن دسدا اے بڑائی حضورﷺ دی
کہڑا کرے گا مدح سرائی حضورﷺدی

قوسین دے مقام نے ایہہ راز کھوہلیا
اللہ ای جاندا اے رسائی حضور ﷺدی

بِن ویکھیاں جِدھے تے کروڑاں نثار نے
صورت خدا نے ایسی بنائی حضور ﷺدی

جھولی چہ دو جہان دی دولت سمیٹ لئی
کِنّی اوہ مال دار سی دائی حضور ﷺدی

میرے توں روز حشر جے پچھیا فرشتیاں
رو رو کے میں دیاں گا دہائی حضورﷺدی

اوتھے تے با یزید جیہے دم نہ ماردے
کِتھے ظہوری کِتھے گدائی حضور ﷺدی