نُور ازلی چمکیا غائب ہنیرا ہو گیا

نُور ازلی چمکیا غائب ہنیرا ہو گیا
کملی والا آگیا ہر تھاں سویرا ہو گیا

حشر تک اوہ پاک راہواں سجدہ گاہواں بن گیّاں
جنہاں راہواں تے میرے آقا دا پھیرا ہو گیا

رب نوں وی ہو گئی دھرتی بڑی محبوب اوہ
جہڑی تھاں تے احمد مُرسل دا ڈیرہ ہو گیا

فخر سارے نیں بجا سوہنے مدینے پاک دے
عرش اعظم توں اوہدا رتبہ اُچیرا ہو گیا

یا رسول اللہ اوہ کِنّے بخت والے لوگ سن
جنہاں دی قسمت دے وچہ دیدار تیرا ہو گیا

ہو گئی مینوں ظہوری درد دی دولت نصیب
مل گیا اے چین جد دا غم ودھیرا ہو گیا