جھنجل وچ پا کے سانوں ربا بیٹھا ایں آپ آسماناں تے
پتہ اے تینوں ہوندے نیں اج کیہ کیہ ظلم انساناں تے
تینوں کیہ کوئی تیرے بُوہے تے دھی تے رُس کے آونی نہیں
مچھر تینوں لڑنا نہیں تے روٹی توں پکونی نہیں
نہ توں کسے ول جانا ایں آونی تیرے کوئی پرونی نہیں
نہ پیلیاں دے وچ ہل واناں ایں نہ بہنا ایں توں دکاناں تے
پتہ اے تینوں ہوندے نیں اج کیہ کیہ ظلم انساناں تے
چھ ست تیرے بال جے ہوندے ہتھیں کرکے کھاندوں توں
سائیکل سکوٹر کول نہ ہوندا ٹر کے کم تے جاندوں توں
تینوں ویہندا چلدیوں ربا کس طرح توں قرآناں تے
پتہ اے تینوں ہوندے نیں اج کیہ کیہ ظلم انساناں تے
تینوں فکر نہ لوڈ شیڈنگ دی ٹٹی سڑک بنانی نہیں
دھوتری تیری جمنی نہیں تے نانی توں دفنانی نہیں
پھر وی لکھنے آں پاگلاں وانگوں قصے تیریاں شاناں دے
پتہ اے تینوں ہوندے نیں اج کیہ کیہ ظلم انساناں تے
مندر چرچ مسیتاں دے وچ متھے میں گھسانداں ساں
سیون شریف تے داتا صاحب وی ہر سال ای جانداں ساں
ایہہ سب کجھ کشفی کر دا رہیا اے ربا تیرے بیاناں تے
پتہ اے تینوں ہوندے نیں اج کیہ کیہ ظلم انساناں تے
اپنے رب نال گلاں
حوالہ: آساں دا سورج؛ صفحہ 44