دل وچ جیہڑے رب دا چانن منگدے نیں
پہلاں ساہ دیاں لیراں ککریں ٹنگدے نیں
دُکھاں بھاویں مونہہ تے لیکاں واہ چھڈیاں
چا تے سجرے ہالی اوہدی ونگ دے نیں
اوہ نہیں ڈُبدے کدی وی عشق سمندر وچ
پیریں چھالے بنھ کے جیہڑے لنگھ دے نیں
اج وی ظلم دے ایتھے لوگ حمائیتی نیں
ایہدا مطلب خطرے حالی جنگ دے نیں
اوہدیاں اکھاں اوہلے بھانبڑ مچ پیندے
سوچاں دے سپ اندروں جہنوں ڈنگ دے نیں
جیہڑے ڈوریاں لیکھے اُتے سٹ بہندے
اونہاں اکھیں سفنے آونوں سنگ دے نیں
اوہدے اندر جھاتی پان دا فیدا کی
جس دے بُوہے جِندرے وجے زنگ دے نیں
یار میں جیہڑے بُکل وچ لُکائے سن
اوہو مینوں اندروں اندری ڈنگ دے نیں
لگدا اے ہُن ہجر ہنڈانا پَینا اے
ایس بہار اِچ پُھل وی کالے رنگ دے نیں
