کربل چ آگئے نیں ساتھی حسین دے
جنت نوں پا گئے نیں ساتھی حسین دے
مقتل پُگا گئے نیں ساتھی حسین دے
عرشاں نوں پا گئے نیں ساتھی حسین دے
دشمن تے خوش کہ زیر اے کیتا حسین نوں
دین نوں بچا گئے نیں ساتھی حسین دے
دل وچ ہی پی گئے نیں پانی دی پیاس نوں
راضی برضا گئے نیں ساتھی حسین دے
اس طرحاں ہس کے موت نوں لایا گلے دے نال
سبھ نوں رُلا گئے نیں ساتھی حسین دے
کیسی عجب اے شان کہ اپنے سراں دے نال
نیزے سجا گئے نیں ساتھی حسین دے
زمانہ کرے گا یاد حشر دے دیہاڑ تک
سبق جو سِکھا گئے نیں ساتھی حسین دے
اِنج اُچا کیتا ناں اوہناں نانے دے دین دا
صدیاں تے چھا گئے نیں ساتھی حسین دے
