درد اوَلّے

ربّا
سوہنیا ربّا
ایہ تیرا بندہ
جہڑا کدی تیرا نائب اکھواندا ہا
اج ایہنوں لگ گئے ہِن
درد اولے
رنگ برنگے درد
جِہناں اُتے انگور نہیں آؤندا
ایہ درد اوَلّے
سدا بہار درد
ایہناں دردیں دا ماریا
زہراں پھکدا
اتے اپنی کنپٹی اُتے رکھ کے پستول
گھوڑا دب ڈیندا اے
میریا سوہنیا ربّا
ایہ کدوں تک
ایہناں درداں تھلے
دبیا رہسی
ایہ کدوں تک زہراں پھکدا رہسی
اتے کدوں تک ایہدے جاتک
جہڑے تیرے فن دا
بہوں اُچا تے سُچا نمونہ ہن
ڈوجھیاں تے ہتھاں اَل
ڈیکھدے رہسن
میریا سوہنیا ربّا
ایہ تیرے بندے
جِہناں نُوں تُوں
اشرف المخلوقات ہون دا
لوبھ ڈِتا آہی
کدوں تک
ایہناں اولیاں درداں اِچ
پھاتے رہسن
میریا سوہنیا ربّا
میریا سوہنیا ربّا