سِکھ چج کوئی یار مناون دا

اج چار چفیرے دُھماں نیں
اج چرچا اوہدے آون دا
عرشاں توں لَے کے فرشاں تک
وسیا اے بدل ساون دا
ایس آپا دھاپی دنیا وِچ
منزل تے پُجنا اوکھا اے
پھڑ باہو ورگا مرشد تُوں
سِکھ چج کوئی یار مناون دا

حق سچ دا جھنڈا چُکن لئی
نیزے تے چڑھنا پیندا اے
ول سِکھ لَے کربل راہیاں توں
لگیاں نوں توڑ نبھاون دا
ہُن ہجر نبی دے وچ یارو
دل بُجھیا بُجھیا رہندا اے
اکھیاں چوں اتھرو کِردے نیں
جیوں ورھدا اے مینہ ساون دا
اوکھ دے ویلے سبھ رَل کے
پڑھو لا الہ الا اللہ

ایہ سبھ توں سُچا نسخا اے
جِندڑی دے روگ مٹاون دا
راجے نُوں پرجا کہندی اے
کیوں ڈکو ڈولے کھانا ایں
بُھل جا تُوں ہر اِک رستے نُوں
پھڑ راہ مدینے جاون دا