سوچاں رکھ تُوں اپنے کول
موہوں مندے بول نہ بول
دنیا ڈاڈھی اے راہکار
ماریا جائیں نہ انبھول
ڈھول وجا کے آکھن دانے
بِتوں ودھ کے بول نہ بول
جِنے مرضی پردے پا لَے
اِک دن کُھل جانے نیں پول
نیت صاف جے ہووے تیری
مِٹّی وِچوں موتی رول
تھاں تھاں پیار دا چھٹا لادے
ایہو دولت ای انمول
بیتیاں سبھے بُھل جا راجا
نَوِیاں نَوِیاں راہواں ٹول
حوالہ: میں تن درد اولے، راجہ رسالو؛ سانجھ لاہور؛ صفحہ 79 ( ویکھو )
