عجیب کیفیت ہے

عجیب کیفیت ہے
سویردی سجری ہوا دا بُلا وی
بدن دا ماس ساڑ رہیا ہے
کِھڑے گلاباں دے چہریاں دی بناوٹی سُرخی
کلیجہ پاڑ رہی ہے
منظر اُجاڑ رہی ہے
عجیب کیفیت ہے
جیویں رات دے پچھلے پہر چیکدے شہر دے کناریاں تے
کِھلرے ویران کھیتاں چے
بُھوتاں دا وین پیندا ہے
کھیتاں دے نال کھلوتی پرانی پپلی دے ہیٹھ
چلدے کُھوہ دا پانی وی درد سہندا ہے

عجیب کیفیت ہے
جیویں وَستی توں دُور بہت دُور کسے ڈِگدے مکان اندر
کوئی موت دے بستر چے آخری پناہ لیندا ہے
تے کِھچ کے ساہ لیندا ہے
عجیب کیفیت ہے
ریشمی خواب چے لپٹیاں صندلی بانہواں نیں
قاف دیاں پریاں تے حسین راہواں نیں
پر فیر وی روح دے مکان اندر
شور ہی شور ہے
شور پاندیاں ہاواں نیں
عجیب کیفیت ہے......!