کیہڑی رات دے کنارے

کیہڑی رات دے کنارے آن کھلوتا واں
دُور دُور تک سویر دا کوئی نشان نہیں اے
کچے ویہڑے چے ہرے کِکر دا رُکھ ہے
روندیاں تے کُرلاندیاں کندھاں دے وَین نیں

کیہڑی رات دے کنارے آن کھلوتا واں
چمگادڑاں گھر دیاں چھتاں تے پُٹھیاں لمکیاں
ڈیلے کڈھ کڈھ ڈران ڈیّاں نیں
اُلوواں دی ہُوک چُپ دے سمے اندر
کلیجہ چِیر کے لنگھ جاندی ہے
چارے پاسے چُپ ہے
لمی چُپ ہے
چُپ دے جندرے توڑ کے تیرا ناں لیندا ہاں
تے سُتیاں کندھاں
اک دم چِیک مار کے شور پا دیندیاں نیں
یاد دا کوٹھا ڈھا دیندیاں نیں

کیہڑی رات دے کنارے آن کھلوتا واں
انھیر ہے گھپ انھیر ہے
گھر دی انگیٹھی تے جھاتی ماردا ہاں
تے اوہ وی سُنجی پئی اے
کچ دا گلاس ہے جہدے کناریاں تے
تیریاں بُلھیاں دا رَس جمیا اے
اک مٹی دا پیالہ ہے جہدے وِچوں
تیرے ساہواں دی سجری خشبو آندی ہے
ہور کجھ وی نہیں اے
ہاں۔۔۔۔۔ویہڑے دا اُداس کِکر ہے
جیہدی ٹہنیاں تے لمکے آہلنیاں چے
روندے خواب تے چِیکدیاں یاداں نیں

کیہڑی رات دے کنارے آن کھلوتا واں
میں کدی کچ دے گلاس دے کناریاں تے لگے
ہوٹھاں دے نشان ویکھدا ہاں
کچی مٹی دے پیالے چے گواچے
سفنیاں دے پیر گولدا ہاں
کدی ککر دے ہیٹھ پئے منجے دی
روندی اکھ ویکھدا ہاں
لمی چپ ویکھدا ہاں
انھیر گھپ ویکھدا ہاں
کیہڑی رات دے کنارے آن کھلوتا واں ۔۔۔۔۔۔۔۔۔۔!