شروع اوس دے نام توں
جہنے دھرتی نوں سورج دی اگ دِتی
جہنے رکھی اے لاج نمانیاں دی
جہنے رُکھاں دے سراں تے پگ دِتی
شروع اوس دے نام توں
جہنے موسماں دی چُنّی نوں رنگ دِتّے
جہنے ونڈیا اے چانن دِیویاں نوں
فیر دِیوے اسمان تے ٹنگ دِتّے
شروع اوس دے نام توں
جہنے ککراں نوں انّبر دی چھاں دتی
جہنے گنھیا اے رُوح نوں مٹی اندر
فِر مٹی نوں مٹی تے تھاں دتی
شروع اوس دے نام توں
جہنے کھولیاں نیں پرتاں اسمان دیاں
جہنے رکھے نیں بھرم جوانیاں دے
جہنے کجیاں نیں شرماں جہان دیاں
شروع اوس دے نام توں
جہنے پانی نوں بدلاں دے گھر دِتّے
جہنے ڈَکے نیں زورہواواں دے
جہنے چڑیاں دے اُڈن نوں پر دِتّے
شروع اوس دے نام توں
جہنے روہی دے بُلھاں تے تس رکھی
جہنے کڈھیا اے آدم جنتاں چوں
جہنے کنکاں دے دانیاں چے چس رکھی
شروع اوس دے نام توں
جہنے اکھیاں نوں ریشم دے خواب دِتّے
جہنے دتیاں نیں رُتاں بہار دیاں
فیر رُتاں نُوں سرخ گلاب دِتّے
شروع اوس دے نام توں
جہنے راتاں دے نال سویر رکھی
جہنے گھلے نیں دکھ زمین اندر
نال خوشیاں دی بھر کے چنگیر رکھی
شروع اوس دے نام توں
حوالہ: اک خیال سمندروں ڈونگھا، صغیر تبسم؛ پرنٹ میڈیا پبلی کیشنز لاہور 2022؛ صفحہ 12 ( ویکھو )
